Ja.... das isch eigentlech e meeeega längi Gschicht... i probiere mi aber churz z fasse...
 
1994 hei mir üs ime Skilager vo der Schueu lere kenne... ig süessi 12 Jährli und der Phippu 14-ni...
ja, i cha das hütt fasch nümme gloube, aber i ha mi doch tatsächlech i so junge Jahre scho i Phippu verliebt... u i ha geng gmeint so früeh sige die Giele no nid interessant...
Auso, vo denn a isch mir dä Phippu nümme usem Chopf. Är auerdings het denn absolut ke Inträsse a so Girls wie mir gha...  -aber isch sicher besser gsy eso...
 
DRÜÜ ganzi Jahr hani immer wider a ihn dänkt und für ihn gschwärmt... mänge Liebesbrief hani ihm gschribe... ... aber es het ne eifach trotz mine Liebesgständnis nid umghoue... *fruuuust*
dr Phippu isch haut scho geng e Charmeur gsyy und het mir immer wider z Härz gstohle...
 
1997 ig 15-ni und Phippu 17-ni;  im Herbstlager vo der Jungschar hei mir wie immer geng wider zäme gschäckeret und gflirtet... aber irgendwie hani mir nümme so viu derby dänkt... irgeneinisch muess oh i das Ganze vergässe, hani dänkt. Und i has gloub würklech langsam begriffe gha, dass dä Phippu mi nid us sini Fründin wott...
 
..... und plötzlech isch aues anders cho, aus i mir das vorgsteut ha gha....
Am letschte Abe het är de gfunde ob mir nid chli zäme gönge go loufe...    .... AUSO bini mit ihm go spaziere... wo mir de ufeme Bänkli sy ghöcklet und är mir d Stärne zeigt het (...läck, wie romantisch...) het är plötzlech si Arm um mi gleit und gfragt ob mir`s doch nid mitenand wöue probiere... WOW!
und mis Härz isch wider gschmolze... KLAR PROBIERE MIR`S!!!
 
Ja, und sit denn sy mir glücklech verliebt... im Jahr 2002 hei mir üs verlobt und am 30.08.2003 hei mir üsi Liebi mit em Ja-Wort besiglet! 
 
Am 30.03.2006 isch üsi Liebi kröhnt worde mit der Geburt vo üsere Tochter NINA!
 
Mi Schatz i Liebe di! I danke dir für dini Liebi, dini Geduld, dis Härz, di Humor.... für das wo du bisch, und das woni cha syy wüu du bi mir bisch.........
Du bisch der bescht Ehemaa u der bescht Papi  für üsi Nina! 
 
in LOVE Sarah