A STAR IS BORN!
Ja, da müesse mir doch e Bitz go ushole... agfange het das ganze ja eigentlech scho em 28.03.2006!
Em 28.03.2006 am Abe 20.00 Uhr hei mir müesse is Spital iträtte zur Ileitig vo der Geburt... mir isch scho chli komisch gsy bi däm ganze... mir hei üs aber glych gfreut z wüsse, dass es nümme so lang cha gah, bis mir di ändlech i üsi Arme chöi schliesse.
A däm Abe isch mir de es Tablettli vore Muetermund gleit worde, wo sött der letscht Astoss gäh, dass die Wehe ändlech so richtig i gang chöme...
Dr Papi isch de mau hei, u i ha e mega unruhigi Nacht, mit Wehe gha, woni vorauem im Chrütz gspürt ha, aber wo glich nid gnue starch sy worde, das du wärsch cho...
29.03.2006
am morge het z`CTG rächti Wehetätigkeit azeigt... d Hebamme hei nid rächt gwüsst, ob si nomau mit Medi derhinder söue oder eifach abwarte, nid dass me das ganze überstimuliert...
Em Mittag hani nomau so es 1/4 Tabl. bercho... abwarte... stägeloufe.... mit em Phippu go spaziere... aues het aber nüt gnützt und du hesch di eifach no nid wöue ufe Wäg mache.
Em abe isch de d Ärztin cho, und het mit üs die ganzi Situation besproche.
Der "Plan" het so usgseh, dass i es Medi uf d Nacht berchume, dass i nomau so richtig guet chönnt pfuuse und em nächschte Tag erhout, und vouer Chraft wär. Denn hätt me em nächschte Tag de dini Geburt mit em Wehetropf (Infusion) igleitet...
AUSO, i ha de die Sprütze em 22.00Uhr em Abe bercho... (riiiiise Nadle wo sech i mis Füdli bohret het...)
der Papi het sech em 22.15 Uhr verabschidet und het oh hei wöue go pfuuse, dass oh är de am nächschte Tag fit isch...
23.00 UHR
es "chlepft" i mim Buuch, i bi ganz pläm vo däm Medi woni ha bercho... i mim Flash inne dänki nume, du chlis Chindli chönntisch mer wenigschtens itze no chli Rueh gönne, u mi nümme so gingge... Aber haut, das bisch nid du gsy... plötzlech isch unkontrolliert uuu viu Wasser ab...
I lüte der Hebamme, die bestätiget mir d Vermuetig, dass d Fruchtblase platzt isch...
Itze gits kes Zrügg me, d Geburt het agfange...
D Hebamme het de gmeint i söu no probiere chli z pfuuse, das chönn no bis zu Stunde gah, bis d Wehe würklech isetze.
*Auso, no schnäu der Papi informiere u de probiere witerpfüüsele...*
23.15 Uhr
uiuiui, plötzlech setze wahnsinnigi Wehe i... u das scho grad im 5 Minute Takt... wahnsinn... u das isch ersch der Afang vo dere Geburt und mi dünkts fasch nid müglech, dass die Schmärze no söue stercher wärde... bi Erstgebärende seit me ja, dass es sech uuuu lang cha hizieh...
23.30 Uhr
D Wehe chöme mängisch scho nume no i 3 Minute Abständ, irgendwie isch es mir gar nümme wohu u i lüte itze mau der Hebamme...
Die seit, si göng mir go Badwasser uselah und de packe mir miner sibe Sächeli zäme u wächsle de mau i Gebärsaal.
Auso, i lüte em Papi a u säge ihm dass es itze rächt ärnscht isch und är doch söu cho... du machsch di definitiv ufe Wäg zu üs... u das ohni Wehetropf... JUHU!
I fah langsam a miner Sache packe... derby verschnuufi ei Wehe um die anderi und es isch mer niene meh wohu... ablänke cha mi z packe oh nümme... uiuiui, wie chunnt das use, langsam machts mer rächt Angst...
24.00 Uhr
d Hebamme holt mi i Gebärsaal.
Mit Sack u Pack watschle ig ihre nache... isch das e ewig länge Wäg gsy.. obwohu`s nume der Ruum näbedranne isch gsyy...
I verschnuufe witer Wehe....
30.03.2006
00.15 Uhr
Di Papi trifft i... auso chline Chnopf... itze chasch cho... :-)
I bi scho fei ime Züg inne, und der Papi het sech rächt schnäu müesse dra gwöhne, dass är mi itze so vouer Schmärze muess gseh...
00.30 Uhr
z `Badwasser isch useglah, und d Hebamme untersuecht mi nomau, bevor i is Wasser darf.
WOW der Muetermund isch bereits 9cm offe... me seit bire Erstgebärende müesss me pro cm 1Stund rächne... nix da... du lasch nümme lang uf di la warte...
I darf i d Badwanne u bi u froh.
Mittlerwile hani fasch kei Pouse meh während de Wehe... i schreie äuä z ganze Spitau zäme... ha mi säuber no gar nie so ghöre schreie und der Phippu höcklet ganz ruhig näbe mir und isch eifach da...
i verschreie miner Wehe mittlerwile nume no... uiuiui... wahnsinn...
ca 01.45 Uhr
d Ärztin trifft yy,... i bi immer no ir Wanne u schreie was es mah... unbeschriblech isch dä Schmärz u dä Druck... zum Glück, cha me sech das vorhär gar nid vorsteue...
D Hebamme seit, si gsehgi di Chopf scho... i chönn dini Häärli oh scho gspüre, wenn i wöug...
Wow, isch das es komisches Gfüeuh gsyy dis Chöpfli mit diner Häärli z gspüre... (juhu es het Haar...)
I muess us der Wanne. Der Ärztin geit das aues chli z schnäu... isch ihre nümme ghür und si wott das i use ufs Bett chume...
Weiss nümme wie i uf das Bett bi cho, aber irgendwie hei mers gschafft.
Ufem Bett setze d Presswehe i. Es isch wie e Erlösig, ändlech chani mitschaffe!
Ändlech aktiv öppis derfür tue, dass du uf die Wäut chunnsch!
02.23 Uhr
ändlech, du "gleitisch" us mir use... ungloublech das Gfüehu...
NINA
du bisch da.
Wunderschön, einzigartig, gsund,
ES WUNDER VO GOTT!!!
Mir dörfe di ändlech i üsi Arme näh!
.... es het sech glohnt!!!.....
