KINDERMUND
EIN PAAR AUSSCHNITTE AUS NINAS WELT...
Mami fragt am morge: "so Nina, göh mir gah z'morge ässe"
Nina: " hhhmmm... Pizza, isch guet" ... eeeender weniger... *grins*
bim Grosi z'Bsuech:
Grosi seit: "gah no schnäu gah bisle, chume grad" Grosi verschwindet im Bad... Nina hingernache, luegt ume Egge is Bad u rüeft "chunnts, he?"
Nina und Mami chöme grad usem Migros use, e Maa stigt uf sis Velo: Nina steit uf im Wägeli u rüeft "Heee, Heum alegge, nid so Velo fahre"...
nachdäm z Mami d Nina x-mau ufgforderet het, z Bäbi vom Bode ufzläse u is Zimmer gah tue, nimmt z Mami de das Bäbi u schiessts is Zimmer vor Nina.
d Nina chunnt cho z renne, schlaat d Händ überem Chopf zäme u rüeft: " Ohhhhh neeeeeeiii" geit zum Bäbi, nimmts ufe Arm u singt: "Heile, heile Säge, drüü Tag räge...."
D Nina fragt: "Mami, Bebe, chunnt de nähär, gäu".... Mami seit "Nei, no grad nid, geit no e Momänt".... Nina "Aha... no chli wachse, he". *jööö*
dr Papi het mit dr Nina Finkli übers Internet bstellt, und dörfe useläse.
Paar Tag speter chöme die Finkli mit dr Post. D Nina het u Fröid am Päckli u natürlech a de Finke.
Die Finke wärde natürlech nähär aune stolz präsentiert, und uf d Frag:" vo wäm hesch de die bercho" seit d Nina "vor Poscht"...
vom Papi, Unggle und anderne het d Nina glert, dass wenn nöime vo Schutte gred wird oder Schutte im Fernseh louft, me "HOPP YB" rüeft.
Mir höckle im Tessin ire Beiz, YB het am Vorabe grad gäge Basel verlore... d Nina rüeft usem nüt "Hopp YB". Eine näbedraa seit "Nei, muesch hopp Basel rüefe, YB het ja verlore"... d Nina wie us dr Pischtole "nei, HOPP YB"... dr ander "Hopp Basel"... da seit dr Chrigu zur Nina "So säg däm haut dr Lade" (aiaiai)... d Nina luegt dr Chrigu a, seit voller Lutsterki "HAUT DE LADE" - luegt dr ander a und seit genau so lut und im gliche Atemzug "HOPP YB"... ja, und somit isch d Diskussion beändet gsy, u mir hei aui müesse lache... :-)
Z Mami ligt bim Frouearzt ufe Schrage, packt dr Buuch us, dass dr Dokter cha Ultraschall mache... d Nina steit vor ihn häre, zeigt ufe Buuch vom Mami u seit: "Da Bebe drin, weisch"... (aus hätt dä das no nid tschegget bis itze...)
Mir sy wider einisch im Migros 
E Agstellti isch grad em Chüeuregal uffülle. Dass si ufemah, steit si ufem Chüeler... d Nina geit häre, luegt se vo unger här mit ärnschter Miine aa u seit: "he, söusch nid tuuuune"...
(Mami u Papi säge dr Nina immer si dörf nid uf de Stüehl, Sofa... umetrune...)
Mir loufe a dr Limmat (Fluss) entlang. D Nina luegt das Wasser aa, zeigt druf u seit: "Papi! Wäääl het eigentlech das Badwänneli gfüüut?"
Papi fragt d Nina: "Wie heissisch du?"
Nina: "Niiina"
Papi: "Und wie no?"
Nina: "MEITÄ"
d Nina het wider einisch so e Tag, wo z Mami cha säge was si wott- d Nina lost nid u macht sicher nid, was z Mami seit.
Da seit z Mami: "Läck Nina, hüt hesch wider einisch kei Ohre, he!!"
D Nina chunnt zum Mami, längt sich a d'Ohre u seit; "Mou, lue Mami, Nina het da Ohre"...
Mir sy bim Gotti vor dr Nina z'Bsuech. Z Gotti het grad früsch es Bebe bercho- dr Cyril.
D Nina isch begeischteret vo ihrem Cousin, und fragt z Gotti ob si ihm dörf dr Nuggi gäh.
ds Gotti seit: "Weisch Nina, dr Cyril het no kei Nuggi..."
Da seit d Nina ganz besserwüsserisch zum Gotti: "Muesch haut eine gah ichoufe"
Nachem Bädle wird agleit. Wo mir fertig agleit u frisiert hei, göh mir zäme is Bad.
I säge zur Nina "Chumm, höckle ufs WC, mir müesse no d Ohre putze".
D Nina seit "ja" höcklet ufe u luegt mir zue, wie ig es Wattestäbli fürenime. Da seit si ganz ärnscht zu mir. "Ah, mit em Fisch-Stäbli d Ohre putze" ...
d Nina het fertig Mittagsschlaf gmacht u rüeft "Maaaaami, fertig gschlafe".
Z'Mami isch no grad öppis am chnüble, u geit nid grad sofort.
Da rüeft d Nina "Heeee Saaaaalaaaah" ... z'Mami muess chli grinse, u macht sich ufe Wäg zu Nina's Zimmer. Chum steit si dervor rüeft d Nina voller Kehle "Heeee Löööiebäääääge, söusch cho, hani gseit"...
z'Mami macht d Türe uf, und d Nina vergigelet fasch i ihrem Bettli...
